alpinauta par furlan

Sul mont di Talm

2010-04-23T14:20:00.000+02:00

A l'ere une vore che no scrivevi alc su chest blog. A l'ere une vore che no lavi ator pai monts in companie di Indy. No ie parude vere di viodi chi netavi il caselot che altre di. A l'à girat dut intor par un toc, come a vole sei sigur ca l'ere ce cal pensave.

Ta la matine di miercui al saltave come un mat: ciamade la robe in machine a l'è saltat dentri in t'un lamp. Pronti e via!

Di lunc la strade par riva a Sostas non l'a nancje uicat. Nancje un cic. ognitant si ramenave, forsit al cjalave fur dal veri: la int, lis machinis, i pais.

Rivin a Sostas e domandi a une siore di une etat indefinide par dula ca si va su al Talm: "ciape la strade tra la cjase blancje e che di claps" mi dise cencje mola di svuangja. Ben po, grasie Siore.

Lin su pa la strade che mo a è sfaltade, mo di tiere plene di busis, mo in beton. Tal daur i sint Indy rondolasi e uica, "sta cuiet che cumo i sin rivas!", dopo velu ancjemo sdrondenat un par di voltis i rivin al rifugjo Talm, tal mieç dal bosc.

Indy al partis subite in quarte, dismenteansi la so robe. Dopo un par di siviladis al torne indaur e alore i sin prons par parti.

La strade va su cuiete in mieç dal bosc, passant dongje cualche stali metut a puest. Il bosc l'è ben tignut, e Indy al va indenant e indaur nulint di ca e di la. Cui sa ce c'al sint!

Rivin al bivio par la siele di talm, e i ciapin a drete lant vie dres par la cime. Indy al sparis di tant in tant, ma une sivilade e al torne dongje a viodi ce ca l'è.

L'arie a è nete e il voli al cjale lontan, si viot fin il Pelmo. I rivin su in cime c'al sofle ben l'ajar, e la viste si viarç dal Peralba al Coglians, fin al Sernio: pecjat ca si fas su un poc di foschie su la plane.

Ancje sa l'è ajar si sta ben sentas in piche, e cialant ator di ca e di la il timp al passe.

Quant che te val a si sint bati un bot, cjapin la strade pa siele di Talm, ma subite dopo tornin su li nestris olmis parce che si va sot fin tes cuessis.

Tornin par do che si vignus su, e cuant che rivin li des cjasis doi siorus nus invidin a bevi il cafe. Son a fa lens, e dos cjacaris in companie a i fas plase falis. Un mi domande se a è ancjemo nef a nord e chel altri si met a ridi vint iniment contis di braconagjo, chel altri al rugne, no i rispuint e al tire for la sgnape: cussi ti disinfete la favele! Ah ah, ce doi. Saludi e ringrazi e torni a la in iu tal cjald dal prim dopomisdi.

Grave, Carso, Cuei: storis di vuere, di mangjà e di bevi

2009-04-20T14:21:00.009+02:00

Sabide di sere, dopo vè dât une cjalade al meteo sul tre, a rive a si pon la question: "Amôr ce fasino domàn?"
"Ievin tôr vot e vjodin il timp"
Lis speris da lis oris e dai minus si corin davour tal rein di Morfeo fintramai ...

"Amôr i voi a vjodi dal timp!"
"Come esie?"
"Mmmh... veladin... un pôc bluette viers i Musi..."

Come disi “Parcè no jevitu e tu cjalis tu, ch no ti va mai ben nue?
I jevi e voi four in zardin, i cjali bande di nord “Bluette? Scûr!!!”

Intant che il lât si scjalde i pensi ce fa. Une domenie siaras in cjase? Posissappò! Viodut che ca di un pôc a tachin i côrs di roce i volevi passà chestes domenies cun l'ApinFemine: ieir vevin pensât a un gîr sore Claut, ma cul timp ca l'è mjor alc'atri. Une cjaminade pe spiagje? Lignan? Grau? Pês? Malvasie?
Intan che i mangjn mi ven tal cjaf il Craso ca mi ere plasût qualche an fa, in t'un marcialonga a Selz, donje Redipuglie. La vastitât dal Čhars lisuntin, lis “farcadiccis” che tant i plasin a Nadia., il terrano ca no mi displâs a mi.
Rivin a la svelte a Ronchi e cjapin la strada che, scjavazzant il plan e puarte a Doberdò. I lassin la machine donje une sbare e i cjapin une strade marcade dal Cai.

I lin indenânt per cheste plane, dolà che il verticâl a no l'è: barač, sterps,somac e pieris. Pieris ca si imberdein cul ciment das trinceis.
Feridis da la tiare ca nus visin di chei oribii ains di inizi nûf cent, quant che la tiere rosse dal Čhars a si messedave cul sanc di fradis muars cun intor diviersis divisis. Timps lontans, e dopo quasi un secul ci si cjate a cjaminà par chest puest, curiôs di savè come ca vivevin chei oms in trincee, cun la fam e i pedoi, a un tîr di sclope dal mâr.
Tornin a cjapà la machine e lin indenat fin la doline dai bersaglieirs. Sôt di une ploute dispetose i lin par i trois sgarfas ta la piere e i rivin ta la pâs da la doline. Novante e passe ains indavour cheste doline a ere un sigûr ripâr dal nemì, foru dal tîr dai mannlicher, e uè a rive ancjemo a trasmeti chel sens di pâs, al reste une filiade a ve iniment, uè come ieir, che di la dal ôr da la doline a ere un'altre vite o forsit la muart.

Ancjemò in machine, sot di un cîl ca nol sa ce fa, continuin a la viars Doberdo, e continuin il nestri gîr a tapis: cumò ven la volte di une piche! Cjaminin dilunc une trincee in ciment, e scjavacin la plane viers i 117 metros dal Mont Sei Busi.

Chi lis linîs talianis e cruchis a si sfilavin une cun che atre par pôs metros: finis i balins si podeve doprà i cla par fa vuere. O si poteve ancje la four par fa quatri cjacaris e mostrasi lis fotos di chei ca erin a cjase. Cui sa! Mi plâs pensa c'al sedi sucedût. Magari si cjatave il contadin c'al lavorave il cjamp dongje.
La ploe a ven jù fine intant che i rivin a Doberdà e continuin il nestri là viers Gurize e i Cuei. Dopo seisi fermâs a gustà bande Caprive polentute cun gorgonzola e nolis, bistecute di angus, erbis di prât cun ueli e ai.. e un bon merlot!!) i lin a torseon pai Cuei, tra vignai e colisei, fermansi a fermà cun t'une foto qualchi biele vedude, sot il cîl grîs di cheste domenie.
E comunque a l'è ancje vegnût four un passaç di boulder

Cun permesso..

2009-04-06T13:31:00.006+02:00

Sot un cîl grîs, Marta nus salude dal barcon al prim plan. Subite nus ven a viergj la puarte abàs. Bussadis, salus e cjacaris di feminis su la panse di Nadia.
Dopo, silensio, dut al ven dismenteât par un moment.
I ientri te sale: Lui al lej il gjornâl.
Sul caminet un quadri in lèn al mostre la Tôr Triest, e al fâs companie al trofeo di un cjamoç e di un cjavriûl.
Su la vetrine in bande afasin mostre di se il Pelmo d’Aur e il Cardo d’Aur, madais dal Coni e gagliardès.
Su la paret davour di Lui un quadri da lis Grandes Jorasses e in bande il trofeo di un stambec famôs: chel de spedizion dal ’58 al Gasherbrum IV.
Cirînt di no impapinami mi ven four un “Mandi, cemût vadie?” “Ben, ben”.
A tachin cussi un par da lis oris plui bielis de me vite.
Passin il timp cjacarànt di no, di montagnis e scaladis di Ricardo, intant che nus ten di voli.
Son vegnudis mancul lis gjambis e il sinti, ma il cjâf e la fuarce tes mans son ancjemo ches. E a fâs impressione pansà che an d’à cent ains.
Il timp al svole e a ven ore di la. Saludin Ricardo e Marta e lin four. Il timp al pâr viargisi.
Un bon augurio par il doman in Grigne

Tamar

2009-03-09T21:18:00.003+01:00

Lis sirenis a scomencin il lor cjant e Roberto al puarte li lor vôs. Lat a fasi fà il fin setemane in Maltatal par la nêf colade iu i decidin di là plui dongje par la a cirì aghe di che dure.
A l'è di tigni cont ancje dal riscjo di lavinis une vore fuart, ma dopo une cjacarade cun Gianni, Roberto al dîs di là in Tamar, in Sclavanie.
I rivin a Planica cà lè dût un quarantevot di int ca lavore par qualchi gare di salt cui sci. L'ajar al beche e nu i sin ben contens.
Roberto al va di presse, seneos di vjodi glace “Se nò mi ven nervôs!”
In curt i sin a Dom Tamar e chi a finis la stradele batude: cumò i vin un biel trop di nêf colade di pestà.
Ientrin tal bosc lant incuintri la mont, lant dentri te nêf fin a miegje cuesse.
Ven l'ore che i rivin a vegni four dal bosc ma di glacie no sin viôt. Lin viers il jalovec e i tachin a viodi alc. Pecjât che a l'è düt sôt la nêf, four che une biele cjandele in somp.. ma in somp sul serio!!
Intant che spudin balins lant indenànt da la parêt da la Veunza a tachin a vegni ju lavinis a manete. Continuin a la indenat ta la nef lant incuintri la cjandele, ma je propite lontane. Somee un miragjo!
Intant li lavinis venin ju ca l'è un spetacul.
A mi ven fin voe di sei là. Tal mieç di che fuarce da la nature ca ven four cuant che si ven a rompi un equilibri.
Intant il sborfà di Robertone mi torne a puarta tal mieç de nef, e dopo vè passat parsore une grosse lavine i rivin sôt de cjandele. Tante fadie par dopo cjata pocje glace e nancje tant biele! Intant che i mangjn continuin a vegni ju a sbrego lavinis. Tachin a torna indavour, sot de mole grandiose dal Jalovec.
Tornin a entra in tal bosc e dopo un pôc Roberto mi fâs:
“satu che i soi content di viodi il rifugjo?”
“Parcè'”
“Parce ca tache il troi batût”
E sa lu dîs Roberto...
Vegni four dal bosc ca somee di sei al marcjât: int, frûs e cjans a spas! Si viôt che i sin in Slovenie!

Ah! L'ortografie!

2009-01-26T08:45:00.002+01:00

A l'è un po di timp che di cheste bande non voi masse indenànt. I soti cirìnt di dai four cun l'ortografie e il vocabolari, ma l'è un biel casin : il furlan imperial no l'è chel de koinè che tu cjatis sui sitos che pandin la marilenghe.

Ce fa alore? io scrif come chi tabaj, visto che mi fas capi d'istès. starai plui atent ai acentos, ma pal rest voi indenant cussì! Pensi che l'important sedi cjacarà e scrivi la nestre biele lenghe ancjemo par i ains che vegnin e no piardile. Pe forme pensarin.

Pal troj

2008-12-02T11:39:00.003+01:00

Une àcuile a svole lisêre
A travierse il cîl
Come une rajade di soreli
A sfante la brume
Lis malsigurecis di un gnûf doman
Al comenčê il nestri lâ
Inceôs e mistereôs
Dentri di noaltris
Lis pôris a son lontans ricuars
Come in t’un mâr verticâl
Stratignûs
Il frêt dai calcârs
Il clip da l’ajar
Leâs di un fîl
Stratignûs
Il pas a l’e dûr
La strete a e sigûre
Lin sû
La piche a e donĝhe
L’emozion di un gnûf orizont

Cumò al comenčê il nestri lâ

Spedizion 2009

2008-11-26T09:57:00.006+01:00

Tal mes di lui dal 2009 i Alpinautas e àn in program une spedizion une vore dûre: la sčhalade par une gnove vie dal mitic Mont Panse.

Par furlan

2008-11-21T08:39:00.001+01:00

Dopo un an di vite Alpinauta al à un version in marilenghe, il parcè al nas dal sens di partignince ae nestre tiere e dal amôr pe nestre lenghe. che lenghe ca nus compagne di lunc il di, ta dutis lis robis che i fasin.

Magari qualche strambolot tal scrivi al vegnarà fûr, qualchi acent four di puest sigûr, ma viodarin di comedasi par strade.